सभासदत्वाची नोंदणी

वार्षिक सभासदत्वासाठी सशुल्क प्रतिक्षा यादी :

• (1) ज्या सभासदांना नियमित वार्षिक सभासदत्व मिळालेले नाही तथापि वार्षिक सभासदत्व हवे आहे, असे सभासद रू.560/- इतक्या रक्कमेचा ऑनलाईन पध्दतीने भरणा करून प्रतिक्षायादीत नाव नोंदवू शकतात.
• (2) प्रतिक्षा यादीतील व्यक्तीस सभासदत्व उपलब्ध करुन दिल्यानंतर 15 दिवसांच्या आत सभासदत्वाची उर्वरित रक्कम भरणे आवश्यक राहिल. तसे न केल्यास सदर सभासदाचे नाव प्रतिक्षा यादीतून रद्द करण्यात येईल व त्याने भरलेली रक्कम पूर्णपणे महानगरपालिकेच्या महसूलात जमा करण्यात येईल.
• (3) प्रतिक्षा यादीत नाव नोंदविणारा सभासद, त्याला नियमित वार्षिक सभासदत्वाची उपलब्धता करून देण्यापूर्वीपर्यंत त्याचे नाव प्रतिक्षा यादीतून कमी करण्याबाबत ऑनलाईन विनंती करू शकतो, असे करणा-या सभासदाने भरलेल्या शुल्कातून फक्त 20% इतकी रक्कम प्रशासकीय आकार म्हणून समायोजित करण्यात येईल व उर्वरित रक्कम सभासदाला परत करण्यात येईल.
• (4) प्रतिक्षा यादीनुसार सभासदत्व उपलब्धतेबाबत कळविण्यात आल्यानंतर सभासदाला त्याचे नांव प्रतिक्षा यादीतून कमी करण्याचा पर्याय उपलब्ध राहणार नाही व कोणत्याही प्रकारे भरलेल्या शूल्काचा परतावा मिळणार नाही.

सभासदत्व शूल्काचा परतावा :

• (1) फक्त वार्षिक सभासदत्व घेतलेल्या व सभासदत्व परत करू इच्छिणा-या सभासदांना ही सुविधा उपलब्ध आहे.
• (2) सभासदत्व रद्द करू इच्छिणा-या अशा सभासदाचा सभासदत्व शिल्लक असण्याचा कालावधी 90 दिवसांपेक्षा अधिकचा असणे बंधनकारक आहे.
• (3) परताव्यासाठीचा अर्ज सभासदाने प्रशासनाने निर्धारित केलेल्या ऑनलाईन पध्दतीने सभासदाला दिलेल्या लॉग-इन मधूनच करणे बंधनकारक आहे.
• (4) सभासदाने सभासदत्व परत करण्याच्या अर्जाच्या वेळेपासून सभासदाचे सभासदत्व संगणक प्रणालीव्दारे तात्पुरते स्थगित केले जाईल व संबंधित अधिका-याने मंजूरी दिल्यावर परताव्याचा अर्ज लेखा विभागाकडे परताव्याच्या अधिदानासाठी अग्रेषित होईल. तथापि ज्या प्रकरणांत संबंधित अधिका-याने परताव्याचा अर्ज नामंजूर केला तर त्या सभासदाचे तात्पुरत्या स्वरूपात स्थगित केलेले सभासदत्व त्याच्या सभासदत्व दिनांकापर्यंत पुनर्स्थापित करून देण्यात येईल. सभासदाने सभासदत्व परत करण्याचा अर्ज सादर केल्यावर कोणत्याही परिस्थितीत अर्ज मागे घेता येणार नाही.
• (5) सभासद शुल्काचा परतावा देताना प्रवेश शुल्क/नुतनीकरण शुल्क ह्याचा परतावा दिला जाणार नाही.
• (6) फक्त सभासद शुल्काचा परतावा सभासदाने सभासदत्व परत केलेल्या दिनांकापासून सभासदत्व संपण्याच्या दिनांकाच्या कालावधीपर्यंत देण्यात येईल.
• (7) असा परतावा देताना उर्वरित कालावधीसाठीच्या देय रक्कमेतून 30% रक्कम प्रशासकीय आकार म्हणून वजा करून उर्वरित 70% रक्कमेचा परतावा करण्यात येईल.
• (8) प्रशासनाने कारवाई करून रद्द केलेल्या सभासदाला कोणत्याही प्रकारे परतावा दिला जाणार नाही.
• (9) प्रशासनाने सभासदत्व रद्द केलेल्या सभासदाने जर प्रशासनाच्या लेखी परवानगी शिवाय ऑनलाईन पध्दतीने पुनश्च सभासदत्व घेतले तर अशा सभासदाचे नव्याने घेतलेले सभासदत्व देखील रद्द करण्याचे अधिकार प्रशासनाकडे असतील व अशा प्रकरणात कोणताही परतावा दिला जाणार नाही.
• (10) मासिक व त्रैमासिक सभासदत्व घेतलेल्या सभासदाला कोणत्याही कारणांस्तव सभासदत्व रद्द केल्यास सभासदत्वाचा कोणत्याही प्रकारे परतावा मिळणार नाही.
• (11) सभासदत्व शूल्क परतावा प्रशासनाच्या नियम व अटींसापेक्ष दिला जाईल.

• (1) सभासदत्वाचे नुतनीकरण फक्त ऑनलाईन पध्दतीने करता येईल.
• (2) सभासदत्वाचे नुतनीकरण पूर्वीचे सभासदत्व संपण्याच्या दिनांकापर्यंत करणे आवश्यक असून नुतनीकरणासाठी कोणत्याही प्रकारे वाढीव मुदत देण्यात येणार नाही.
• (3) नुतनीकरण न केल्यामुळे रद्द झालेले सभासदत्व पुनर्जिवीत करता येणार नाही.
• (4) नुतनीकरणानंतर पोहण्याच्या सुविधेचा लाभ घेण्यापूर्वी सभासदाने परिशिष्ट क्र.एक नुसार वैद्यकिय प्रमाणपत्र कार्यालयात सादर करणे आवश्यक आहे. वैद्यकिय प्रमाणपत्र सादर करेपर्यंत सभासदाला तरण तलावात प्रवेश प्रतिबंधित करण्यात येईल.
• (5) सवलतीच्या दरांत नुतनीकरण करणा-या सभासदांनी आवश्यक ती कागदपत्रे कार्यालयास सादर करणे बंधनकारक असून कागदपत्रे सादर करेपर्यंत सभासदाला तरण तलावात प्रवेश प्रतिबंधित करण्यात येईल.

1. जागतिक महिला दिनाचे औचित्य साधून दि.08.03.2023 पासून, महिलांसाठी राखीव असलेल्या सत्रांत महिला सभासदांना विशेष सवलतीच्या दरांत प्रवेश देण्यात येईल व त्यांचा सभासद कालावधी दि.01.04.2023 पासून सुरू होईल.
2. दि.08.03.2023 पासून, महिलांसाठी राखीव असलेल्या सत्रांसाठी प्रवेश घेणा-या महिलांना सभासद शूल्कात 25% सवलत देण्यात येईल.
3. ज्या महिला सभासदांनी दि.08.03.2023 पूर्वी वार्षिक सत्रासाठी प्रवेश घेतला असेल किंवा वार्षिक सभासदत्वाचे नुतनीकरण केलेले असेल,अशा फक्त महिला सभासद जर तरण तलावाच्या सर्वसाधारण वेळांऐवजी फक्त महिला सभासदांसाठीच्या राखीव वेळेची सुविधा घेऊ इच्छित असतील तर अशा महिला सभासदांना त्यांनी अर्ज केल्याच्या दिनांकापासून सभासदत्वाच्या अंतिम दिनांकापर्यंतचा कालावधी जर 90 दिवसांपेक्षा अधिक असेल तर अशा महिला सभासदांना त्यांनी भरलेल्या एकूण उर्वरित कालावधीच्या अतिरिक्त सभासदत्व शुल्काचे परिगणन करून अशा सभासदांना सभासदत्व मान्यता कालावधी वाढवून देण्यात येईल. तथापि सत्र बदल करू इच्छिणा-या महिला सभासदांच्या सभासदत्वाचा अंतिम सभासद दिनांक 90 दिवसांपेक्षा कमी असेल तर अशा महिला सभासदांना सत्र बदलामुळे मिळणारी सवलत लागू होणार नाही. नुतनीकरण करताना सत्र बदलाची विनंती केल्यास सवलत शुल्क भरून नुतनीकरण करून देण्यात येईल.
4. उपरोक्त नमूद सवलती घेऊन प्रवेश घेणा-या/नुतनीकरण करणा-या महिला सभासदांना महिलांसाठी राखीव सत्रांव्यतिरिक्त इतर सत्रांत पोहण्यास बंदी असेल.
5. उपरोक्त नमूद सवलती न घेता प्रवेश घेणा-या/नुतनीकरण करणा-या महिला सभासदांना महिलांसाठी राखीव सत्रांसह इतरही सर्व सत्रांत पोहण्यास अनुमती असेल.
6. सवलत प्रवर्गांत म्हणजेच शालेय विद्यार्थी,बृहन्मुंबई महानगरपालिकेचे कर्मचारी/नगरसेवक, वरिष्ठ नागरिक तसेच दिव्यांग नागरिक ह्या विशेष प्रवर्गांत प्रवेश घेणा-या महिला सभासदांना उपरोक्त नमूद सवलती देण्यात येणार नाहीत.
7. सदर सवलत मासिक, त्रैमासिक आणि वार्षिक महिला सभासदांकरिता देखिल असेल. महिलांसाठी राखीव सत्रांव्यतिरिक्त इतर सत्रांत पोहायला येणा-या महिलांना कोणतीही सूट देण्यात येणार नाही.
8. सदर सवलतीच्या सत्रात प्रवेश घेणा-या सभासदांना जलतरण तलाव सभासदांसाठीचे सर्वसाधारण नियम लागू असतील.
9. सदर सवलतीचे दर रद्द करण्याचे अधिकार प्रशासनाकडे राहतील.

तरण तलावाच्या सभासदाच्या ऑनलाईन शिफारशीनुसार ज्या अभ्यागताला पोहता येत आहे, अशा अभ्यागतास तरण तलावाचे दैनंदिन तिकिट मिळू शकेल. पोहता न येणारा अभ्यागत आढळल्यास त्याला तरण तलावाबाहेर काढण्यात येईल व भरलेल्या शूल्काचा कोणताही परतावा दिला जाणार नाही. असे तिकिट काढताना मूळ सभासदाच्या लॉग-इन मधून तो सभासद ज्या तरण तलावाचा आहे त्याच तरण तलावाचे तिकिट अभ्यागतासाठी आगाऊ शूल्क भरून उपलब्ध होऊ शकेल. पाहूणा सभासदाला परिशिष्ट क्र.एक नुसार वैद्यकिय प्रमाणपत्र सादर करणे बंधनकारक असून वैद्यकिय प्रमाणपत्राची वैधता एक वर्षाची असेल. वैद्यकिय प्रमाणपत्र सादर न करणा-या पाहूणा सभासदास तरण तलावाची सुविधा उपलब्ध करून दिली जाणार नाही व शूल्काचा परतावा दिला जाणार नाही.

पाहूणा सभासदाला नेमून दिलेल्या वेळेपेक्षा अधिक काळ त्याने तरण तलावाची सुविधा उपभोगल्यास नियम क्र.8(8) नुसार मूळ सभासदावर कारवाई केली जाईल. पाहूणा सभासदाने गैरवर्तन केल्यास मूळ सभासदाचे सभासदत्व रद्द करण्याचे अधिकार प्रशासनाकडे राहतील.

पोहण्यासाठी येणा-या प्रत्येक सभासदांनी उपलब्ध लॉकरला स्वत:चे कुलुप लावून लॉकर वापरून जलतरणाची सुविधा घेतल्यावर तरण तलाव सोडण्यापूर्वी लॉकर रिकामा करुन स्वत:चे सामान व कुलुप घेऊन जावे. त्यामुळे पोहण्यासाठी येणा-या प्रत्येक सभासदास खण उपलब्ध होतो. पोहण्याच्या सत्राची वेळ संपल्यावर खण रिकामा करुन न जाणारा सभासद आढळून आला तर त्याच्यावर दंडात्मक कारवाई करण्यात येईल किंवा असा सभासद आढळून न आल्यास किंवा त्याची ओळख न पटल्यास खणाचे कुलुप कापून टाकण्यात येईल व आतील सामानाची विल्हेवाट लावण्यात येईल, याबाबत बृहन्मुंबई महानगरपालिका प्रशासन कोणतीही जबाबदारी स्विकारत नाही. अशा प्रकरणांत दंडात्मक कारवाई/ सभासदत्व रद्द करण्याचे अधिकार प्रशासनाच्या अधीन राहतील.

• (1) प्रत्येक सभासदाने स्वत:च्या जबाबदारीने पोहावयाचे असून तरण तलाव परिसरातील कोणत्याही अपघातास /दुर्घटनेस बृहन्मुंबई महानगरपालिका प्रशासन जबाबदार राहणार नाही.
• (2) सभासदास संगणकिय प्रणालीव्दारे प्रवेश नोंदविल्याशिवाय जलतरण तलावात प्रवेश दिला जाणार नाही.
• (3) सद्यस्थितीत वार्षिक सभासदत्व (365 दिवसांपैकी, लागू असलेल्या सार्वजनिक व साप्ताहिक सुट्ट्या आणि प्रशासनाने मंजूर केलेल्या कार्यक्रमांसाठी वर्षभरात बारा दिवस वगळून) देण्यात येईल. प्रशासनाने मासिक/त्रैमासिक सभासदत्वाबाबत नव्याने निश्चित केलेल्या धोरणाला अनुसरून सभादत्व देण्यात येईल.
• (4) सभासदत्व घेतलेल्या सभासदाला साप्ताहिक व सार्वजनिक सुट्ट्या वगळून तरण तलाव चालू असलेल्या दिवशी खाली नमूद केलेल्या वेळांमध्ये सलगतेने एकंदर 60 मिनिटांच्या कालावधीत जलतरणाची सुविधा वापरण्याची अनुमती आहे, ज्यात पोहण्यापूर्वी आणि पोहण्यानंतरच्या स्नानाचा व कपडे बदलण्याचा वेळ समाविष्ट आहे. (पोहण्यापूर्वी स्नान करणे सक्तीचे असून पोहण्यानंतर अंघोळीची सक्ती नाही.)
• (5) शिकाऊ सभासदांना उपस्थित जलतरण निर्देशकांव्दारे मोफत प्रशिक्षण देण्यात येते. शिकाऊ सभासदाने तरण तलाव परिसरात डोक्यावर लाल रंगाची टोपी घालणे बंधनकारक आहे. अन्यथा त्याचे सभासदत्व रद्द करण्यात येईल.
• (6) सभासदांना जलतरण तलावात जलतरण तलावाच्या क्षमतेनुसारच प्रवेश देण्यात येईल. सभासदांनी तरण तलावाच्या नियमावलीतील अनुक्रमांक 4 येथे नमूद केलेल्या नियमांचे पालन करणे आवश्यक आहे. सद्यस्थितीत खालील नमूद वेळांत तरण तलावांची सुविधा सुरू आहे.

  प्रवर्ग	जलतरण तलावाच्या वेळा : मंगळवार ते रविवार
  सर्व सभासदांसाठी	सकाळी 06.00 ते सकाळी 11.00
  फक्त महिला सभासदांसाठी	सकाळी 11.00 ते दुपारी 12.00 सायं. 05.00 ते सायं. 06.00
  सर्व सभासदांसाठी	सायंकाळी 06.00 ते रात्रौ 10.00
  प्रत्येक सोमवारी साप्ताहीक सुट्टी म्हणून तरण तलावाची सुविधा सभासदांसाठी संपूर्णत: बंद असेल. वर्षभरात उपरोक्त सुट्टयांव्यतिरिक्त प्रशासनाने सार्वजनिक सुट्टी म्हणून निर्धारित केलेल्या आठ सुट्ट्यांच्या दिवशी तसेच बारा दिवस प्रशासनाने मंजूर केलेल्या केलेल्या कार्यक्रमांसाठी जलतरण तलावाची सुविधा बंद ठेवण्याचे अधिकार प्रशासन राखून ठेवत आहे. अशा बंद कालावधीकरिता सभासदांना सभासदत्वाचा कालावधी वाढवून देण्यात येणार नाही.

• (7) बृहन्मुंबई महानगरपालिकेच्या कोणत्याही जलतरण तलावांचे सभासद असलेला व्यक्ती त्याचे सभासदत्व असलेला तरण तलाव सोडून इतर कोणत्याही तरण तलावाचे स्वत:साठी उपलब्धतेनुसार, आगाऊ शुल्क भरून दैनंदिन तिकिट घेऊ शकतो.
• (8) नेमून दिलेला सत्राचा कालावधी संपल्यावर आस्थापनेच्या बाहेर न पडणा-या सभासदांचा वैध कालावधी टप्प्याटप्प्याने कमी करण्यात येईल. त्याचा तपशिल खालीलप्रमाणे आहे.

  दैनंदिन निर्धारित सत्र कालावधीपेक्षा अधिक वापराचा कालावधी	मान्य वैधतेचा कमी करण्यात येणारा कालावधी
  01 ते 60 मिनिटं	एक दिवस
  61 ते 120 मिनिटं	दोन दिवस
  121 ते 180 मिनिटं	तीन दिवस
  181 ते 240 मिनिटं	चार दिवस
  एखाद्या सभासदाने सलग तीस दिवसांच्या कालावधीत अधिकचा कालावधी पाच पेक्षा जास्त वेळेस वापरल्यास उपरोक्त वजावटी व्यतिरिक्त पंधरा दिवसांचा वैधता कालावधी कमी करण्यात येईल.

• (9) कमी करण्यात आलेल्या वैधता कालावधीची मुदत साठ दिवसांपेक्षा अधिक झाल्यास अशा सभासदांना सभासदत्वाचे नूतनीकरण करता येणार नाही. वैधता कालावधी संपल्यावर त्याचे सभासदत्व संपुष्टात येईल. तथापि सदर सभासद उपलब्धतेनुसार नविन सभासदत्वाची प्रक्रीया पूर्ण करून नविन सभासदत्व घेऊ शकतो.
• (10) जीवरक्षक/जलतरण निर्देशकांशी सभासदाने हुज्जत घातल्यास सभासदत्व रद्द करण्यात येईल. सभासदाला कोणतीही तक्रार असल्यास त्याने त्याची तक्रार कार्यालयातील तक्रार नोंदवहीत नोंदविणे आवश्यक आहे. तक्रारीबाबत आस्थापनेतील कोणत्याही कर्मचा-याशी हुज्जत घालू नये/वादविवाद करू नयेत व असे केल्यास सभासदाचे सभासदत्व पूर्णपणे रद्द करण्याचे अधिकार व्यवस्थापनाकडे असतील.
• (11) जलतरणासाठी व्यवस्थापनाने निर्धारित केलेला पोषाख परिधान करणे सभासदांना बंधनकारक असून योग्य पोषाख परिधान न करणा-या सभासदाला पोहण्यास अनुमती दिली जाणार नाही. महिला सभासदांनी पोहताना टोपी घालणे बंधनकारक आहे तसेच लांब केस असणा-या पुरूष सदस्यांनी जलरोधक टोपी घालणे बंधनकारक आहे.
• (12) सभासदाने स्वत:चे कपडे, चीजवस्तू, सामान स्वत:च्या जबाबदारीवर ठेवावे. ते गहाळ झाल्यास/ चोरी झाल्यास व्यवस्थापन जबाबदार राहणार नाही.
• (13) कोणतेही तेल/ बॉडी लोशन/रसायन/क्रिम इ. लावून येणा-या सभासदांना जलतरण तलावात प्रवेश दिला जाणार नाही. शरीराच्या कोणत्याही भागावर बँडेजपट्टी केलेल्या सभासदांना तरण तलावात प्रवेश दिला जाणार नाही.
• (14) इतर सभासदांना इजा होण्याची शक्यता लक्षात घेता नखे वाढलेल्या सभासदांना तरण तलावात प्रवेश दिला जाणार नाही. उपाशीपोटी, थकलेल्या अवस्थेत, ताप आलेला असताना किंवा कोणत्याही व्याधीने आजारी असताना पोहण्यास बंदी आहे तसेच कोणत्याही प्रकारचा त्वचारोग/संसर्गजन्य रोग आढळल्यास किंवा सभासद आजारी असल्याचे आढळल्यास सभासदाला प्रवेश नाकारला जाईल.
• (15) तरण तलाव स्नानगृहात तसेच परिसरात दात घासणे, नखे कापणे, केस कापणे, दाढी करणे यास बंदी असून असे करताना आढळणा-या सभासदाचे सभासदत्व रद्द करण्यात येईल.
• (16) जलतरण तलावात काचेचे/ धातूचे/ प्लास्टिकचे धार्मिक धागे, दागदागिने किंवा तत्सम आभूषणे घालून प्रवेश करू नये, सभासदाची कोणतीही वस्तू गहाळ झाल्यास तक्रार स्विकारली जाणार नाही व प्रशासन त्यास जबाबदार राहणार नाही.
• (17) उथळ पाण्यात उड्या मारण्यास/ सूर मारण्यास बंदी आहे.
• (18) सभासदांनी /पाहूणा सभासदांनी/ अभ्यागतांनी पादत्राणे (चप्पल/बूट इ.) घालून तरणतलावात तसेच डेकवर फिरण्यास बंदी आहे.
• (19) फक्त पोहण्यासाठी येणा-या सभासदांनाच डेकवर प्रवेश दिला जाईल. सभासद पोहण्यास आला नसेल आणि सभासदाने डेकवर प्रवेश केला तर अशा सभासदाचे सभासदत्व रद्द करण्याचे अधिकार व्यवस्थापनाकडे असतील. सभासदांव्यतिरिक्त अन्य कोणासही जलतरण तलाव परिसरात (डेकवर) प्रवेश दिला जाणार नाही. ज्या तरण तलावाकरिता प्रेक्षक सज्जा उपलब्ध असेल तेथे सभासदांबरोबर येणा-या पालकांना/ अभ्यांगतांना प्रेक्षक सज्जात विनामुल्य प्रवेश दिला जाईल. महिलांच्या विशेष सत्राच्यावेळी प्रेक्षक सज्जात महिलांव्यतिरिक्त कोणासही प्रवेश दिला जाणार नाही. लहान मुलांसोबत येणा-या पालकांनी प्रेक्षक सज्जात बसून आपल्या पाल्यांवर लक्ष ठेवावे. पालकांना जलतरण तलाव डेकवर प्रवेश दिला जाणार नाही. जलतरण तलावाच्या किना-यास उभे राहू नये. जीवरक्षक/ जलतरण निर्देशकांना अडथळा निर्माण होईल अशा पद्धतीने घोळका जमवू नये. अशा पाल्यांचे सभासदत्व रद्द करण्यात येईल.
• (20) जलतरण तलाव परिसरात धावणे, एकमेकांना धक्का मारणे, उड्या मारणे, आरडाओरडा करणे, गाणी गाणे, नाचणे, कोणत्याही यंत्राच्या / वाद्याच्या आधारे संगीत वाजविणे यांस बंदी आहे.
• (21) ज्या जलतरण तलावांच्या ठिकाणी बृहन्मुंबई महानगपालिकेतर्फे ध्वनीक्षेपकांव्दारे (Public Addressed System) संगीत वाजविण्याची सुविधा आहे. तेथे महानगरपालिका कर्मचा-यांच्या उपस्थितीत संगीत वाजवता येईल व ध्वनीक्षेपकांवर कोणत्या प्रकारचे संगीत वाजवायचे याबातचे अधिकार व्यवस्थापनाकडे राहतील.
• (22) खाण्याच्या / पिण्याच्या वस्तू जलतरण तलावावर नेण्यास बंदी आहे.
• (23) जलतरण तलाव परिसरात प्राणी आणण्यास मनाई आहे.
• (24) सभासदांकडून कोणत्याही प्रकारे महानगरपालिकेच्या मालमत्तेचे नुकसान झाल्यास त्याची संपूर्ण भरपाई सभासदांकडून करण्यात येईल व प्रसंगी सभासदाचे सभासदत्व रद्द देखील करण्यात येईल. तसेच पोलिस/कायदेशीर कारवाई करण्याचे अधिकार व्यवस्थापनाकडे असतील.
• (25) कोणत्याही जलतरण तलाव सभासदाला जलतरण तलाव प्रशासनाच्या कर्मचारी/अधिका-यांच्या कर्तव्यामध्ये हस्तक्षेप करण्याचा अधिकार नाही.
• (26) कर्तव्यावर असलेल्या जलतरण तलावावरील कर्मचा-यांच्या सूचनांचे पालन करणे सभासदांसाठी बंधनकारक आहे.
• (27) प्रशासनाने जर ओळखपत्र दिले आणि सभासदाचे ओळखपत्र गहाळ झाल्यास,चोरी झाल्यास दुय्यम ओळखपत्रासाठी विहीत शुल्क भरून दुय्यम ओळखपत्र उपलब्ध करून देण्यात येईल. नियम शिथील करुन दुय्यम ओळखपत्र उपलब्ध करून देण्याबाबतचे अधिकार व्यवस्थापनाकडे राखून ठेवण्यात येत आहेत.
• (28) वय वर्षे 02 च्या खालील नागरिकांना सभासदत्व दिले जाणार नाही. वय वर्ष 02 व त्यावरील ते 06 वर्षांपर्यंतच्या सभासदांच्याबाबतीत प्रवेश घेताना प्रौढ सभासदाने परिशिष्ट क्र.दोन नुसार प्रतिज्ञापत्र सादर करणे बंधनकारक असून अशा सभासदांसमवेत प्रतिज्ञापत्र सादर करणा-या किंवा प्रतिज्ञापत्रात नमूद केलेल्या प्रौढ सभासदांनी पाण्यात उतरणे बंधनकारक आहे, अन्यथा दोन्ही सभासदांची सभासदत्वे रद्द करण्यात येतील. फक्त वय वर्षे 06 पर्यंतच्या मुलांना महिलांसाठीच्या विशेष सत्रात त्यांच्या महिला पालकांसमवेत प्रवेश दिला जाईल. वय वर्षे 18 पर्यंत वयाच्या सभासदांना सभासदत्व घेताना पालकांचे हमीपत्र सादर करणे आवश्यक आहे.
• (29) नैसर्गिक किंवा कोणत्याही आकस्मिक आपत्तीमुळे/ घटनेमुळे तरण तलावाची सुविधा बंद करणे गरजेचे असल्यास त्याबाबत सर्व अधिकार व्यवस्थापनाकडे असतील व अशा घटनांच्या वेळी कोणत्याही प्रकारचा परतावा करण्यात येणार नाही अथवा अतिरिक्त वाढीव कालावधी देण्यात येणार नाही.
• (30) दहा दिवसांपेक्षा जास्त कालावधीसाठी प्रशासनाच्या कारणांस्तव तरण तलावाची सुविधा बंद ठेवण्यात आली तर बंद कालावधीइतका कालावधी सभासदांना वाढवून देण्याचे सर्व अधिकार प्रशासनाकडे राहतील. दहा ते तीस दिवसांपर्यंतच्या कालावधीसाठी जलतरण तलावाची सुविधा बंद ठेवावी लागली तर सभासदांना वाढीव कालावधी देण्याबाबतचे अधिकार संबंधित तरण तलाव व्यवस्थापनांच्या अधीन असतील व त्याहून अधिक कालावधीसाठी जलतरण तलावाची सुविधा बंद ठेवावी लागली तर संबंधित उप आयुक्तांच्या मंजूरीने सभासदांना वाढीव कालावधी देण्यात येईल. तथापि सभासदांना वाढीव कालावधी देण्याबाबतचे सर्व अधिकार प्रशासन राखून ठेवत आहे. वाढीव कालावधीबाबत कार्यालयाचे/प्रशासनाचे निर्णय सभासदांना बंधनकारक असून त्याबाबत कोणतीही तक्रार स्विकारली जाणार नाही.
  आवश्यकतेनुसार वार्षिक परिरक्षणासाठी प्रति वर्षी सलग दहा दिवस तरण तलाव बंद ठेवण्यात येईल व ह्या बंद कालावधीसाठी कोणतीही वाढ/परतावा देण्यात येणार नाही.
• (31) एखाद्या सभासदाबाबत अन्य सभासदांकडून कोणतीही तक्रार प्राप्त झाल्यास त्याची शहानिशा करून ज्याच्या विरूध्द तक्रार प्राप्त झाली आहे, अशा सभासदाचे सभासदत्व रद्द करण्याचे अधिकार सहाय्यक व्यवस्थापक/व्यवस्थापक यांच्या अधीन असतील.
• (32) पाण्याचा अपव्यय करणा-या सभासदांवर कारवाई करण्याचे तसेच सभासदत्व रद्द करण्याचे अधिकार सहाय्यक व्यवस्थापक/व्यवस्थापक यांच्या अधीन असतील.
• (33) गैरवर्तणूक करणा-या सभासदांचे तसेच नियमांचा भंग करणा-या सभासदांचे सभासदत्व रद्द करण्यात येईल, याची सभासदांनी नोंद घ्यावी.
• (34) जलतरण तलावावर आणि परिसरात धुम्रपान/मद्यपान करण्यास बंदी आहे तसेच तंबाखू, गुटखा, अंमली पदार्थ सेवन करण्यास / सेवन करून येण्यास/खाऊन जलतरण तलावात प्रवेश करण्यास मनाई आहे. असा सभासद आढळल्यास त्याचे सभासदत्व रद्द करण्याचा अधिकार प्रशासन राखून ठेवत आहे.
• (35) जलतरण तलाव परिसरात नागरिकांना/सभासदांना छायाचित्रे/सेल्फी काढण्यास/चित्रीकरण करण्यास मनाई आहे. अशा प्रकरणांत सभासद असलेल्या सभासदांचे सभासदत्व रद्द करण्यात येईल व इतर प्रकरणी पोलिस/कायदेशीर कारवाई करण्यात येईल.
• (36) अस्वच्छतेच्या कारणांस्तव सभासदाला जलतरण तलावाच्या सुविधेपासून वंचित ठेवण्याबाबतचे (तात्पुरते निलंबन) तसेच सभासदत्व कायमस्वरूपी रद्द करण्याचे अधिकार कार्यालयाकडे असतील, अशा प्रकरणांत कोणताही वाढीव कालावधी/परतावा दिला जाणार नाही.
• (37) प्रशासनाने सभासदत्व रद्द केलेल्या सभासदाने जर प्रशासनाच्या लेखी परवानगी शिवाय ऑनलाईन पध्दतीने पुनश्च सभासदत्व घेतले तर अशा सभासदाचे नव्याने घेतलेले सभासदत्व देखील रद्द करण्याचे अधिकार प्रशासनाकडे असतील व अशा प्रकरणात कोणताही परतावा दिला जाणार नाही.
• (38) बृहन्मुंबई महानगरपालिकेच्या प्रचलित नियमांनुसार/धोरणानुसार सभासदांना/ पाहूणा सभासदांना/ अभ्यांगतांना त्यांची वाहने उभी करण्यासाठी त्या-त्या आस्थापनेत जागेच्या उपलब्धतेनुसार विहीत शुल्क भरून वाहने उभी करता येऊ शकतील. तथापि सभासदांनी/पाहुणा सभासदांनी/ अभ्यांगतांनी त्यांची वाहने स्वत:च्या जबाबदारीवर उभी करायची आहेत. सभासदांना वाहने उभी करण्यासाठी जागा उपलब्ध करून देणे व्यवस्थापनास बंधनकारक नाही.
• (39) ज्या तरण तलाव संकुलात जलतरणाशिवाय इतर क्रीडा प्रकार उपलब्ध आहेत. अशा ठिकाणी जलतरण तलावाचे नियम इतर क्रीडा प्रकारांच्या सभासदांना त्यांच्या खेळाच्या स्वतंत्र नियमावलीसह बंधनकारक असतील.
• (40) बृहन्मुंबई महानगरपालिकेच्या धोरणानुसार शुल्कसूचीत दरवर्षी नियमित दरवाढ केली जाते. त्यानुसार देय असलेले शुल्क भरणे सभासदांना बंधनकारक असेल. (सध्या लागू असलेले परिपत्रक क्र.सीए/एफआरएम/49, दि.07-02-2013)
• (41) कोणत्याही तरण तलावाच्या एखाद्या सभासदाकडून वसूली करायची असल्यास ती कोणत्याही तरण तलावाचे सभासदत्व घेताना करण्याचे अधिकार प्रशासन राखून ठेवीत आहे.
• (42) परताव्यांच्या प्रकरणांत उप आयुक्त (उद्याने) त्यांच्या विशेषाधिकारात निर्णय घेऊ शकतील.

आवश्यकतेनुसार वरिल सर्व नियम व विनियमांत बदल करण्याचा अधिकार प्रशासन राखून ठेवत आहेत.